Kennad ihr den Grillblatz, den d‘Stadt vor a baar Johr do hindr m Sportblatz aglegt had? Der Blatz war no koine drei Wocha ald do hend se diea scheene rode Disch scho hegmacht. Do warad Lecher drin, ma kan sich gar it vorstella wiea so ebbes god. Mir hend des bei dr Stadt gmeldad ond dann had ma richtig grobe dicke Breddr fir diea Disch gnomma.

Neilich guggad mir wiea des jetzad do aussieht ond was glauba dr. Des Lumbapack hat semdliche Disch he gmacht. Obwohl a Fuierstell do isch hend se auf de Disch grillt ond riese Lecher in die Tisch neibrennt. Do gibt Stadt so an Haufa Geld aus, damit Leid, diea vielleicht koin Gadda hend, oder fir de Jonge dass se koim aufd Nerva gangad, grilla kennad, ond dui Baggasch macht mit Gwald alles he.

Wenn so ebbes siehsch kennd oim doch s Fidla schwätza.
So isch doch, oder wa moina dr ?

Lilo Finkele