Eigendlich han i romgoscha wella, weil des mit dera Stadtallee nix wird. Abr se werd demnägschd feddig.

Also lob i desmol alle EHRIS, diea i in Befinga om da Birgertreff rom kenn: Do send diea Bläddles Leit, ohne diea gäbs eisr Bläddle it. Ma mecht it glauba was des allaweil fir a Saugschäfd isch bis des Ding feddig isch.

Diea fir Umweld, Bau ond Verkehr gugad, dass wenn jemand ebbes zom aussetza had, de entsprechende Leid Bescheid griagad. D Kuldura, was diea in de ledsche Johr alles drher brocht hend (ond no dr her brengad), des isch ja au koi Scheiß – odr?

Diea Leid, diea sich jetzad om d Flichdling kimmerad. D RPG-Finanzminischdrin, was diea emmer fir a Gschies hat mit birokratischa Käs, ma glaubs it. Von de Kirche, wenn so a Feschdle isch wiea dr Bigbandbiergadda, des isch oifach Klasse, was die do machad.

D Kaffeekanna, diea am Mondag Dorda ond Kucha bachad ond dann am Namidag verkaufad. Bei Befinga in Bewegung bis zu 18 Stigg. Des Geld, was se einnemad, sponserad se firs Friedensdorf ond oimol em Johr fir a kuldurella Gaude.

Dann diea Striggdanda, ja was diea für nedda Sacha machad des muas ma gsäh hau.

S gibt no me, diea sollad älle au globad sei – wen i namendlich erwähna soll, der solls hald saga dann mach i des.

Heid han i koin Blatz me, sonsch wird gstricha.

So isch doch, oder wa moina dr ?

Lilo Finkele