Jetzt hend mir doch bei dr RPG an nuia Vorstand. Ma sods net glauba desmol hads ibrhaubt net lang daurad bis ma diea Leit beanander ket had. Nochdem dr Hansl Grünbeck gschdorba isch ond dr Herr Seemüller oifach koi Zeit had, häd ma ja an nuia brauchd.

Do geids Leit diea sell macha kendad diea hend scho so an Haufa am Bagga, dass se sagad, noi jetzt nix me – wenns it god dann gods idda.

Nau hat ma oifach bei dr Frau Deutsch, (diea macht ja scho beim Blättle an Haufa) nochfrogad ond beim Herr Wallis, der duad au scho bei dr RPG beim AK Bau and Verkehr mit. Ma hatse it drangsaliere missa bis se gsaid hend – mir machad des, diea gend jo doch koi Ruha. Noi, boide hend „ja“ gsaid – obwohl se so an Haufa mit ihrem Gschäft wo se s Geld hoimbrenga missad zom doa hend. Des isch richtig Klasse von dene boide.

Alle send gligglich weils net wiea bei dr Geburd vom erschda Bläddle vor zeha Johr – a Geesdreckszieherei*  war. Do hoffad mir, dass des ganz lang hebt, mir versprechad au, dass mr se ondrstitzad wos grad god.

So isch doch, oder wa moina dr ?

* Gänsedreckzieherei – wie: es dauert eben etwas länger (das ist für alle, die nicht schwäbisch könned)

Lilo Finkele